問誰領風騷。。

自從迷上了喝葡萄酒後，漸漸令我相信，有些事情、事物是需要經過沉澱才能變得更美好。原諒我才疏學淺見識少，好多被認為係神級、高分、天價既酒我都未飲過。可以話我冇能力負擔、冇際遇遇上，甚至係"喝不到的葡萄酒是酸的。"不過我仍然堅信，好既葡萄酒，首要既條件係一般大多數人能夠負擔得起。作為一種飲品，七、八萬一支D.R.C； 四、五萬一支Screaming Eagle係咪好酒，我唔知。或許是個身份象徵、是個目標、是個憧憬都高於其飲用的價值，而且只有小部分人能試到。當然，始終影響酒價既因素實在係太多。

Biondi Santi Brunello，位於意大利中部的Tuscany，鄰近Chianti產酒區。究竟魅力係邊度，令佢成為產區三巨頭之一，甚至聞名於世？其中之一我相信係佢既傳奇。佢對100% Sangiovese既努力同堅持，不斷的選育配種以改良品種，所釀造的酒不斷的獲得各項大賽的獎項。而最重要貢獻莫過於在1932年，他所培育出來以Brunello命名的優秀新種Sangiovese，正式被官方認定，有同樣志向的酒莊紛紛加入種植該品種，大大提升該產區的品質，至此之後” Brunello di Montalcino”成為義大利最高級的酒款之一，並能與Piemonte的Barolo並駕齊驅的頂尖酒款。

Risevra 1983，打開了錫紙，木塞跟瓶頂都發霉了，完全失去了彈性，浸了九成酒液，像是一觸即碎似。開瓶後竟然只有少許老酒味，但不到十分鐘就已經回復典型的Brunello味道，我才驚歎"她"是如此年輕。莊主講過他的Brunello一般要10年才適飲，能存20年或以上；而Risevra 20 - 25年適飲，能存50年之久！當然50年可能係講緊Ex-Chateau，而且講究存放條件，並唔係每一支都做得到。原瓶呼吸12小時，落杯後一切條件都很好，在Burgundy杯亦撐得起，顏色磚紅，甚至接近橙紅邊。淡淡而令人回味的乾花香，是乾玫瑰嗎？還是紫羅蘭？果是Cherry、Plum，再來像是松露、菇類；之後又有陣陣像是油畫、油彩的味道；酒友說是因為這個地方跟以前文藝復興的地方很近使然，也說得通。口感變化不太大，以果味為主，酸度中等，單寧仍然足夠，至少中等甚或以上的Sweet Tannin；After taste Medium+。整體感覺係柔和優雅的，像是隱世高人在孤芳自賞似、尤然自得。飲左4小時慢慢開始回落。但我好肯定，呢支酒係我飲過既Brunello裡面最好既一支。不愧為Brunello之教父，果然係名不虛傳。可惜佢老人家已經過左身，以後就只可以係舊年份既酒先可以重溫，真係可遇不可求！適飲期已到，個人認為呢支酒如果保存得理想，應該可以有多一個五年。

至於Vega Sicilia，西班牙又一個傳統而名氣較大既傳奇酒莊。基地設係Ribera del Duero，有著接近150年的歷史，其後慢慢擴展設立其他酒廠，如Alion and Pinita in Toro。以本土品種Tinto Fino (即Tempranillo)為主軸，混釀國際知名品種如Cabernet Sauvignon, Merlot, Cabernet Franc等等。最高級別酒為Unico，並且只係於“理想“的年份才會釀造，並有混合不同年份既Unico陳酒，稱為“Unico Reserva Especial NV“。大比例的Tempranillo up to 85% 混釀Cabernet Sauvignon及極微量Merlot或其他品種
，視符當年情況決定，釀成後通常最少於莊內存放10年先上市；如1968同1982年既Unico就陳年存至1991年先上市。至於適飲期，莊主講到明Unico係for aged的，新式超最少都要等十至十五年，而舊式則要待二十年才開始，兩者亦可存四十年甚至更久遠，係極長壽既怪物。另外
 ，酒評家Jancis Robinson就曾經評論過，如果要將Unico同法國葡萄酒作比較，絕對會係五大莊既級數，風格就接近Chateau Latour。

今次試到既係Vega Sicilia既另一款酒，Valbuena 5 1996。“5”，代表釀成後再陳年5年才上市；Valbuena係D.O Ribera del Duero產區入面其中一條村名。莊主曾戲言：“如果忍唔住、等唔切Unico到適飲期，可以飲住呢支頂住先。”為左達到提早享用，係Tempranillo做基礎上加入大比例Merlot及小部分Cabernet Sauvignon。好多人都稱之為Unico既二軍酒，但釀酒師就話唔係，用來自葡萄田內不同區域而且係較年輕的提子，不同既釀造方法，所以極其量都只可以係第二款旗艦酒。坊間的評語話Valbuena 5就已經有Unico既八成功力。

講到酒既感覺，係屬於接近粗獷有力，丰富既果味以及突出既橡木桶香。乾黑梅、李子、Blackcurrant、青椒、香料如花椒八角、肉桂同雲尼拿，Tar。18年酒但係一D陳年氣息都冇，反而係Deep Ruby ，有個性，年輕，強而有力，結實既單寧酸度都算突出，同擁有挺長而實在的收結。有著自家製既木桶廠供應，以西班牙人喜愛既美國桶為主。由細法國桶轉落大美國桶；由100%新桶轉更落舊木桶再陳年;經過複雜既轉桶陳年處理，為的是令香氣及酒質有更多層次而且更加融合。我相信再陳多一個十年都唔會有好大問題既。

總括而言，今次能夠同場品嚐呢兩支極品，我真係好榮幸，又上了一課，充分反映左葡萄酒陳年適飲的美。對我黎講，其實兩支都不分上下，雖然當日係西班牙酒表現比較搶眼美豔，但意大利卻令人飲得好舒服，各有千秋！