跳到主要內容

工作記＃2

每一日 我都會有個指定動作一定要做的 就係必須要替手錶上鍊
而每日的這個動作 彷彿就在提醒我 時間正在被小偷一分一秒的拿走
每一次抬頭望向這片天空 心裡面都會有一種說不出的感概 
已經想不起 以前於香港 對上一次這樣看天空到底是何時 難道 這就叫作“成長”嗎？
黎到德國工作兩個月，終於搵到方法同呢度既波蘭同事作簡單溝通；
點樣？全靠Google大神， 喺工餘時間，幾個傻佬坐係部電腦前面，
摸住酒杯底，英文Google黎波蘭文Translate去咁，場面都幾Funny〜
就係咁樣一次又一次，之後感覺上大家工作默契好左。
最近收到通知，Harvesting將會係九月二十号左右進行。
日子愈接近，我地每日既工作壓力就愈來愈沉重，因為要趕係收割前完成所有葡萄園的準備工作。而事實亦都証明左，老闆呢一類社會階層並唔會因為地域或者國籍而有所不同，每朝早Briefing完之後，波蘭叔叔個面色都好似唔係幾好；咁我宜家個老闆係點？可能係同你、又或者妳個老闆一樣囉。大家都係打工仔，明既〜
其實如果唔係熱衷於Wein又或者工作相關，喺葡萄園打工的而且確係會有Ｄ悶；
每日去到唔一樣既地方對住睇落一樣但係事實上又有唔同既提子，做到身水身汗污糟邋遢；雖然話就話大家一齊做野，但係一人負責一條Line，都冇乜機會溝通；就算有，離開左Google大神，我地都立即變翻“有限公司”，所以好多時候都係自己同自己工作；咁當中到底係“苦”定係“甜”？對於我黎講，無錯現階段既工作其實都算幾Tough ga。
不過此‘苦’並不等如彼‘苦’，起碼每一日從工作中我都有所得著。喂喂，唔係講緊响金錢上呀〜！而係工作過程開心之餘，時間過得快且每日都有新野學到。（過去嗰一星期都唔知點解，天空上面想搵舊大Ｄ既雲睇下都冇，個太陽講唔出咁惡毒....）

先唔講天氣，個人認為如果要係酒莊工作，首要條件係必須要接受到小昆蟲經常喺你身邊出現，特別係蜘蛛；因為無論喺田地、喺Cellar定係喺屋企，都總有幾個網喺你左近.... 蛇，So far touch wood 暫時未遇過；未黎之前原本以為鄉郊地方應該會好多蚊，所以防蚊措施做到足，點知原來唔係；可能呢度地方大動物多，蚊就唔多咬人，反而其他飛蟲蜜蜂蒼蠅就好多；做野既時候，手腳不時都會痕痕地，望下就會見到原來有隻蜘蛛（昆蟲）喺度行緊，習慣左之後我都唔得閒理佢，都係等佢自己走啦（對上一次就有條手指公般粗的毛毛蟲）；反而我最怕係喺我耳邊飛嚟飛去嗰Ｄ，成日都驚會走入去耳仔度.....有時候當你剪開提子，又會有好似小型蟑螂咁既昆蟲走出黎.....
最令我覺得討厭係呢種雜草，可以穿過衣服刺到皮膚，會有種俾熱針扎到既感覺，仲要持續幾分鐘；而頂部既花黏左落衫同襪度就點整都整唔甩
至於最近品酒多唔多？其實都唔算好多；相反，食提子既機會比品酒黎得更多；
就咁摘落黎就食，乾唔乾淨？唔太乾淨嫁，仲有塵tim.... （可能我對手仲比較污穢Ｄ）不過就勝在夠新鮮－朝早凍凍的好似擺過係雪櫃咁，下晏就熱辣辣的－Anyway，Nothing Harmful〜每日工作睇住佢地一日比一日成熟，日日係咁試，我就愈係有衝動想試到佢最佳Condition到底應該係點樣，畢竟試飲同食提子係我角度黎講係工作既一部份，絕對不可或缺〜〜

講開食提子，種植黎釀酒既提子同係街市超級市場買到既其實係完全唔一樣：食用提子多為美洲品種，表皮更薄、果肉更厚同更細既核，酸度較低；相反釀酒用既提子則多為歐陸品種，提子本身皮厚顆粒細且味道更為濃縮，擁有較高果汁含量之餘又有更高甜高酸。而喺最近試食過既葡萄入面，我既感想係：Cabernet Sauvignon係未夠熟既時候就真係會Bell Pepper既味道、Merlot肥大肉厚且感覺食落似藍莓、Pinot Noir就相對細粒而味道就貼近草莓、Riesling就冇咁Juice同酸度似足Lemon、Sauvignon Blanc反而冇想像中咁酸，食落有種好似唔多熟既青桃感覺......
近期至愛 － Müller Thurgau － 一種完全唔起眼而且唔多人認識既葡萄品種。
雖然本質簡單，但勝在産量多、大大粒又甜又多汁，有Ｄ似平時食開既青提咁，所以開工既時候多數都會剪定一串拎住係手一路做一路食，都真係幾Happy〜 

 Müller － Stand for 瑞士植物學家Dr. Hermann Müller；Thurgau係瑞士其中一個行政區；1882年，Hermann Müller 想研製出一種高品質，表現穩定且具早熟特質的葡萄品種，於是就將Riesling跟 Madeleine Royale兩種葡萄雜交培育。Müller Thurgau係全球最廣泛種植的人工配種提子，主要的種植地喺德國、奧地利、瑞士、義大利北部及紐西蘭；而喺德國，其種植面積亦只僅次於Riesling，屬於非常早熟的品種。由於好容易受到真菌和黴菌侵襲，且果實和莖部又容易腐爛，所以相對其他葡萄品種更需要採取較多嘅保護措施。
咁當然，食過提子，冇理由唔試埋成品葡萄酒；一般而言Müller Thurgau常做Daily Wine，愈係新鮮享用就愈好；而今次我就選擇左距離只有1公里多的鄰村 － Oberrotweil － 既作品，同樣購自超級市場；

基於Baden行政區於德國偏南，陽光普照且相對溫暖，提子糖份比例較高，所以會見到酒精度都有11.5%；喺我角度黎講佢會係偏向香氣型：混集白色的細花、甜美既Stone Fruit如白桃、香梨，同時亦帶點輕微麝香（動物）味；值得注意嘅係如樽後的label所講，This wine is suggested to be serve in between 8 - 12'c， cannot be too cold；太凍的話就會掩蓋酒本身既香氣，簡言之：浪費了。口感方面厚度中等、酸度唔高，約Medium－；就如香氣一樣屬Fruit Driven Style，美中不足嘅係只可以作短暫停留。

假如作為日常餐酒，絕對令人滿意；酒本身到底係好定唔好，標準只不過係客觀；同做人一樣，人有唔同階級不同崗位，葡萄酒都有；只不過係需要6€就可以好好的享受一日，特別係德國呢種陽光明媚既夏天又有微風；坐係室外，有份意式Bruchetta、一碟Light Cheese with Raisin & Toast；咁就真係‘對酒當歌，人生幾何呢？’
River Dreisam - Freiburg -  2016/8/13


留言

張貼留言

這個網誌中的熱門文章

Tasting note : Pundel vins purs, Crémant de Luxembourg, Riesling Brut

Pundel vins purs , Crémant de Luxembourg , Riesling Brut A sparkling wine from Luxembourg's Moselle district made according to the traditional method ( Méthode Traditionnelle ) : Second Fermentation was done in the bottle and at least 9 months for maturation. And , Luxembourg is the only country entitled to use the term of “ Crémant" outside France. With a clear yellow-green hue , fruity notes picked up on the nose like pear and green apple when first smell. Its good activeness of bubbles with youthful vigour that I was quite surprise. Yeasty and nutty notes can be found on palate which enhanced its depth. Moderate acidity and seems there were certain amount of residual sugar left. Will be better if its finish can be last a bit longer. In general this is a good sparkling wine as starter , toasting or even party wine goes with canapés. Refreshing , easy to drink and affordable price. It keeps well as a white wine even if bubbles ran out. Wou...
張貼留言
閱讀完整內容

回憶，多半是酸溜溜的。

最近覺得，自己開始踏入試酒既領域。大路既國家已經開始捉到用神，都算係一個好既開始。畢竟，2013已經過去，新一年都應該有個新開始… Bodega Catena Zapata，意大利人去到阿根廷紮根，目標係釀造出最接近當地風土既酒。又的而且確，我飲過最好飲既Malbec、阿根廷酒，就只有呢個酒莊。對我黎講，佢代表了這個國家的酒，打開了我的門。就價錢而言，中級酒款已接近四百，旗艦酒款更接近一千。外行人以至一般飲家而言係不值一買。不過，一分錢一分貨，你願意俾錢，佢絕對交到功課。2010新酒，一開瓶就進入狀態，濃度好高，酒精感強，深色到不得了。皮革、肉桂、乾香草，新鮮而高濃度黑梅、雲尼拿，感覺到木桶香氣同枝酒融合得好好，是緊緊的而唔係分開散散的。果香的甜，令人悄悄忽略左本身一定既酸度。當然，咁濃既酒絕對唔可以飲得好多。如果話Chabis是生蠔的伴，羊架就是Malbec。如再多等個三年，我認為會更好。 我覺得，1993年開始造酒，ConoSur 一直都可以話係智利餐酒中的一個保證，所謂 ‘蔗喳既價錢，造到叉燒既味道’。記得Decanter都有講過佢呢支Pinot Noir既物值高，個人認為已經望到澳洲、紐西蘭既水準，而且智利Casablanca出既Pinot又一直水準穩定。不過，比起之前飲過既Single vinyard Cabernet Sauvignon，又差左一D深度。Red Cherry、Grassy、Drill herbs、Slightly Oak aroma，Medium Body，Medium Acidity。 以一支不到二百元的酒來說就很不錯，同埋最緊要係飲得舒服。值得一提既係，落左醒酒器，更開放，更好飲。而今年其中一個既飲酒目標係，要試一支高級酒款既智利酒！ 講真！我真係好鐘意飲Brunello…！ 同埋唔知點解，總係覺得神之水滴，第十二門徒係南美酒…
張貼留言
閱讀完整內容

又係平價貨。今次係大廠的智利。

你可以話我鐘意飲平價酒，可以話我唔識品酒，我都承認。不過試新野、係性價比高既酒後面搵到驚喜、探索可能性，都可以話係我一直品酒的動力。 近年開始暢銷的新世界中，智利可以話係多左人識左。價錢低、易入口、種類多、市面上容易買到，都可以話係彈起的因素。其實，已經有部份舊世界酒莊睇中左新世界地方既Terrior，去左當地建莊做實驗，出名既有Lafite去左Chile set up Los Vascos、Mouton co operate in USA setting up Opus One。 Los Vascos Cabernet Sauvignon 2011，我既感覺係幾架構幾實淨，平衡度不錯。開瓶時個Cork係膠令我有點不悅。聞到樽口既味道後，第一時間放番入酒櫃，感覺上佢要先Breathe。果然原瓶兩個鐘後，溫和了不少。落左杯之後發覺，平價智利酒都係有個特色，Oak Chips。同價比較Spain and Italy，明顯唔同既係，後兩者會將酒整到好Fruit，甚至有後加糖的疑團。講番支酒，深紫色；嗅出Leather，BlackFruit，青椒，麵包味，感覺上並不屬於"果汁"之類，彈度中等。入口感覺有點像辣椒，胡椒，輕輕的果味、葉子味；高酸，粗糙的單寧，像舔樹枝一樣的感覺；酒精感算中等，收結屬中低等。 Colchagua Valley位于Chile中部，有別於其他產區不算近海，相對比較溫暖，很適合Cabernet Sauvignon生長。呢支酒做Daily wine都唔錯，suitable with any meat with seasoning，價錢係Below $100，係Supermarket買到。  至於Cono Sur就做Table wine 做到出晒名，呢支只係$60，都俾到我兩段變化。不過就屬於厚重型，很濃。印象是重Bell Pepper味，Oak Chips，濃縮果汁的甜味。Carmenere呢種提子只係智利先有，今次既第一感覺唔錯，下次會嘗試更高級一D。不過更有興趣想試同一系列既Shiraz同Pinot Noir。
張貼留言
閱讀完整內容